كل ماتكون تافه كل ماتاخد فلوس أكتر

طبعاً كلنا عارفين قضية حنين حسام التي نالت حديث السوشيال ميديا اليومين دول فتاة التيك توك اللي كانت بتحرض البنات انهم يفتحوا الكاميرات لمدة 4 ايام مقابل شوية دولارات اهم حاجة تكون حلوة شكلاً ومضمونا وتم القبض عليها واتهامها بانها بتدعي للدعارة الالكترونية واستغلال البنات ..

ودي نتيجة طبيعية للانتشار الفاحش للسوشيال ميديا واليوتيوب والتيك توك ومنصات البيجو وغيره كتير من البرامج اللي شجعت الشباب يرتبطوا بالبرامج دي بشدة مقابل محتويات تافهة ملهاش قيمة لا وكمان كل ماتكون تافه تاخد فلوس اكتر السوشيال وميديا دي جزء من الاعلام الكبير اللي بيتكلم باسم بلد بحالها لو لم تتم الرقابة عليها هنشوف كل يوم وكوارث وفضايح وبلاوي ومليون واحدة ذي حنين حسام ..

حاليا الحكومة بتتحمل اعباء كتيرة جدا في سبيل الارتقاء بالدولة المصرية واقتصادها بس من وجهة نظري لازم يكون الاساس سليم نتجه شوية لتطهير الاعلام ونحاول نصحح مسار واتجاهات الشباب ويكون في حدود لدخول السوشيال ميديا لمصر لأن الأسرة للاسف مش هتعرف تسيطر علي كل البلاوي دي نظراُ لاختلاف الازمنة وتباعد الفترة بين هذا الجيل وجيل االاباء والامهات يعني الشاب لو قال لوالده انا بذامر علي الموبايل يبقي بيذاكر وده لان التكنولوجيا شئ مستحدث لم يعاصره الاباء للسيطرة والحد منه ..